Partido di Pirata ta defendé un demokrasia liber, unda tur konosementu, arte i kultura ku humanidat a produsí, ta inmediatamente disponibel pa un i tur. E krísis di Korona ta mustra kon importante ta pa kompartí konosementu libramente. Nos ta preferá invertí den bon instalashonnan públiko, komo kapasidat di prueba, investigashon di fuentenan i kontakto i sufisiente personal di salú, na lugá di restringi e derechonan i libertatnan sivil. Nos ta asumí e konfiansa den e personanan i ta tene un deskonfiansa sano den e konsentrashonnan di poder di gobièrnu i empresanan. Den un sosiedat di informashon liber, nos ta tuma huntu e desishonnan más huisioso.

Derechonan sivil ta garantisá e libertatnan personal i ta proteha e siudadanonan kontra e arbitrariedat di gobièrnu of empresanan. Derechonan sivil ta e base di nos movementu. Hasi konseshonnan ku derechonan sivil ta nifika hasi konseshonnan na e base di demokrasia. Komo Partido di Pirata, semper nos ta purba mara tur nos akshonnan na e derechonan básiko di nos siudadanonan.

Un gobièrnu habrí i transparente ta un kondishon básiko pa un bon demokrasia. Solamente ora siudadanonan por kuestioná e funkshonamentu di su gobièrnu i por kontrolá e gobièrnu, ta posibel pa tin un representashon adekuá di e pueblo.

Demokrasia ta un diálogo i desishon mutuo di nos sosiedat. Den un demokrasia, tur hende tin un bos i ta keda skucha. Nos ke pa tur hende tin e oportunidat pa partisipá den e proseso di tuma desishon. Di e manera aki, nos ta utilisá tur e konosementu, eksperensia i ekspertisio di nos sosiedat.

E akseso liber na informashon, konosementu i kultura ta un kondishon pa e desaroyo sosial, teknológiko i ekonómiko di nos sosiedat. E leinan aktual di derechonan di outor i patèntnan ta krea un monopolio di informashon ku solamente ta benefisiá e empresanan grandi i ta hasi difísil pa ta aksesibel. P’esei, nos ke reformá profundamente e legislashon aki.